Якын көннәрдә Татарстанда һава торышы үзгәреп торачак. Атна башында явым-төшемнәр көтелми диярлек. Ә пәнҗешәмбе көнне республикага Атлантик циклон якынлашачак. Аның белән бергә яңгыр, юеш кар һәм көчле җил киләчәк.

Бу хакта Татарстан Гидрометеорология үзәге белгечләре хәбәр итә.

Сишәмбе, 17 ноябрьдә, Татарстанның күпчелек районнарында явым-төшем булмаячак. Көнчыгышта гына урыны белән кар яварга мөмкин. Төнлә һава температурасы 0дән −5 градуска кадәр, көндез −2…+2 градус булачак. Тәүлек дәвамында томан төшүе, юлларда бозлавык барлыкка килүе ихтимал.

Чәршәмбе, 18 ноябрьдә дә сизелерлек явым-төшем көтелми. Төнлә термометр баганалары −1…−6 градуска кадәр төшәчәк, көндез −1…+2 градус булачак. Төнлә һәм иртән урыны белән томан төшәргә мөмкин.

Пәнҗешәмбе, 19 ноябрьдә, республикада һава торышы Атлантик циклон йогынтысында формалашачак. Атмосфера басымы түбәнәячәк, күк йөзе болытлар белән капланачак. Төнлә юеш кар, көндез яңгыр явуы көтелә. Аерым районнарда җилнең тизлеге секундына 15 метрга кадәр җитәргә мөмкин. Төнлә һава температурасы 0…−5 градус, көндез +1…+4 градус тәшкил итәчәк. Төнге һәм иртәнге сәгатьләрдә урыны белән бозлавык сакланачак.

Синоптикларның беренчел фаразына караганда, 20 һәм 21 ноябрьдә дә тотрыксыз һава торышы сакланачак. Республикада яңгырлар явуы көтелә. Көндез һава температурасы +2…+5 градуска кадәр күтәреләчәк.