«Адымнар-Түбән Кама» гимназиясендә «Фән-фест» республика фестивале узды. Анда Татарстанның 12 шәһәр һәм районыннан 130дан артык яшь тикшеренүче катнашты. Проект темалары төрле: иске әйберләргә икенче тормыш бирүдән башлап, микрояшеллек үстерү серләренә һәм роботехникага кадәр.

Конкурсантлар дүрт секциягә бүленде: инженерия һәм техника, табигый фәннәр, математика һәм IT, шулай ук социаль-гуманитар дисциплиналар һәм иҗат.

«Адымнар-Түбән Кама» гимназиясе укучылары Талия белән Айзилә әкияти пазллар проектын тәкъдим итте. Алар сүзләренә караганда, рәсемнәр җыю уены дәресләрдә һәм тәнәфес вакытында куллану өчен бик әйбәт: балаларда вак моториканы үстерә һәм Тукай иҗатына мәхәббәт тәрбияли.

«Башта без бөек шагыйрьнең әкият геройларын сайладык, аннары рәсемнәрне төсле принтер аша чыгарып, тактага беркеттек, әтиләр махсус станок ярдәме белән рәсемнәрне төрле кисәкләргә бүлделәр», — дип белдерде катнашучылар.

Бәйгенең дүрт еллык тарихы бар, аның географиясе елдан-ел киңәя. Быел «Инженерлык Республикасы» проекты катнашучылары һәм «Адымнар»ның алты гимназиясе укучылары үз осталыкларын күрсәтте.

«Бу эшләргә бәя бирүче жюри әгъзалары — безнең социаль партнерлар, чөнки балалар мәктәпне бетергәч, дөрес белем алып, үзләренең юнәлешләрен 100 процентка үзгәртмичә, шул заводларга, фабрикаларга барырга тиеш. Моның өчен балаларга күрсәтергә кирәк: бүген предприятиеләрдә нәрсә белән шөгыльләнәләр? Төп максат — мәктәптән үк аларны киләчәк һөнәрләренә әзерләү, шул чакта гына ачышлар зуррак һәм уңышлырак булачак», — дип билгеләп үтте «Яңарыш» республика фонды башкарма директоры Зөлфия Сөнгатуллина.

Фестивальнең йомгаклау өлешендә барлык катнашучылар һәм җиңүчеләр Түбән Каманың алдынгы предприятиеләре, югары һәм урта һөнәри белем бирү йортларыннан дипломнар һәм бүләкләр белән билгеләнде.