17 ноябрьдә Түбән Камада ВАЗ-2107 автомобиле йөртүчесе җәяүлене таптаткан. Руль артында 19 яшьлек егет булган. Юл-транспорт һәлакәте сәгать 20:30 тирәсендә Төзүчеләр проспектындагы 24 нче йорт каршында килеп чыккан.

Бу хакта Дәүләт автоинспекциясенең матбугат хезмәте хәбәр итә.

Беренчел мәгълүматларга караганда, ВАЗ-2107 йөртүчесе Төзүчеләр проспекты буйлап Химиклар проспекты белән кисешкән якка таба хәрәкәт иткән. Ул светофор булмаган җәяүлеләр кичүе аша чыгучы 65 яшьлек хатын-кызны таптаткан.

Һәлакәттә зыян күргән хатын-кызны ике аягы сыну һәм тәненең төрле урыннары җәрәхәтләнү белән хастаханәгә китергәннәр.

Юл һәлакәтенең сәбәпләре ачыклана.