Быел алар өч мәйданчыкта уза: «Комета» базары территориясендә, Южная урамындагы гипермаркет янында һәм Кама Аланы бистәсендә. Түбән Кама фермерлары белән беррәттән, үз товарларын Ютазы районыннан килгән җитештерүчеләр дә тәкъдим итә.
Рәсилә Сабирова кәҗә асрау белән шөгыльләнә. Ул сөт, эремчек һәм төрле сырлар җитештерә. Бүген әлеге продукцияне ярминкәдә тәкъдим итә.

«Кәҗә сөтеннән эшләнгән май, эремчек, сырлар ясап алып килдем. Үземнең рецептым буенча чәкчәк пешердем. Түбән Кама халкына да тәкъдим итәсем килде», — дип белдерде Рәсилә Сабирова.

Сәүдә рәтләрендә сайлау мөмкинлеге зур: сөт һәм ит ризыклары, йомырка, яшелчә, бал һәм башка төрле авыл хуҗалыгы продукциясе тәкъдим ителә. Даими сатып алучылар да барлыкка килде — шәһәр халкы ярминкәләрне атна саен көтеп ала.

«Ярминкәләрдә төрле районнардан фермерлар катнаша. Бу атнада Ютазыдан килделәр, киләсе атнада Баулыдан кунакларны көтәбез. Без шәһәрдәшләрне сыйфатлы һәм экологик яктан чиста продукция сатып алырга чакырабыз», — дип белдерде Түбән Кама муниципаль районы башлыгының авыл хуҗалыгы мәсьәләләре буенча ярдәмчесе Альфред Нигъмәтҗанов.

Сәүдә мәйданчыклары ял көннәрендә иртәнге 8дән көндезге 14.00 кадәр эшли. Ярминкәләр 1 майга кадәр дәвам итәчәк.