Бәйрәм кайтавазы

Халык иҗаты йортында, Укытучылар көне уңаеннан, өстәмә белем бирү өлкәсендә хезмәт куючы педагоглар өчен тантаналы концерт узды. Бәйрәм чарасында мәдәният өлкәсендә хезмәт куючы педагогларга – балалар музыка мәктәпләре, бию сәнгате студияләре һәм балалар иҗат үзәкләре укытучыларына хөрмәт күрсәтелде. Алар яшь талантларны ачыклау, үстерү һәм иҗатка тартуда зур өлеш кертә.

Чара башында бәйрәм кунакларын сәхнә геройлары булып киенгән артистлар каршы алды. Укучылар исә укытучыларына үз куллары белән ясаган матур открыткалар бүләк итте. Истәлекле мизгелләрне фотога төшерү өчен махсус фотозона да булдырылган иде.

Тантаналы концерт программасын педагогларның үзләре тәрбияләгән укучылары әзерләгән. Сәхнәдә балалар музыка һәм хор мәктәпләрендә белем алучылар, шулай ук бию сәнгате студияләрендә шөгыльләнүчеләр чыгыш ясады. Яшь артистларның чыгышлары остазларының да, аларның укучыларының да югары иҗади әзерлек дәрәҗәсен күрсәтте.

Муниципаль район башлыгы Радмир Беляев педагогларга фидакарь хезмәтләре өчен рәхмәтен җиткерде. «Түбән Камада искиткеч иҗади команда эшли. Мәдәният өлкәсендә өстәмә белем бирү челтәре бик киң. Әмма балаларны яраткан, үз һөнәренә тугры һәм профессиональ педагоглар булмаса, болар бары тик буш диварлар һәм бүлмәләр генә булыр иде», — диде ул.

Бәйрәм кысаларында мәдәният өлкәсендә хезмәт куючыларга бүләкләр дә тапшырылды. Алар арасында балалар музыка мәктәпләре һәм балалар иҗат үзәкләренең директорлары, укытучылары һәм методистлары бар. Аларга күпьеллык намуслы хезмәтләре, яшь буынга белем һәм тәрбия бирүдәге тырышлыклары, остазлык эшчәнлеге өчен Мактау грамоталары һәм Татарстан Республикасы профсоюзлар федерациясенең күкрәк билгесе тапшырылды.

Укытучы хезмәте — белем бирү белән генә чикләнми. Ул баланың сәләтен күреп, аңа үз көченә ышанырга ярдәм итү, иҗатка юл ачу һәм киләчәккә ныклы нигез салу. Түбән Камада яшь талантларны тәрбияләүгә үз өлешен керткән педагогларның хезмәте дә әнә шул югары максатка юнәлдерелгән.

Абруйлы бүләккә лаек булдылар

Мәскәүдә узган класс җитәкчеләре форумында яшьләрнең гражданлык позициясен формалаштыруга, Ватанга мәхәббәт хисе тәрбияләүгә зур өлеш керткән педагогларга хөрмәт күрсәтелде. Тантана Россиянең Милли үзәгендә узды. Мактаулы бүләкләрне Россия Федерациясе мәгариф министры Сергей Кравцов тапшырды.

Бүләкләнүчеләр арасында Түбән Камадан ике мәгариф учреждениесе җитәкчесе дә бар. Алар — Евгений Королёв исемендәге Түбән Кама политехника көллияте директоры Татьяна Куприянова һәм Николай Лемаев исемендәге Нефтехимия һәм нефть эшкәртү көллияте директоры Айдар Фаретдинов.

Әлеге бүләк — педагогларның һәм алар җитәкләгән коллективларның яшь буынны тәрбияләүдәге хезмәтенә бирелгән югары бәя. Бу көллиятләрдә һөнәри белем бирү белән беррәттән, студентларны актив гражданлык позициясенә, җаваплылыкка һәм туган илгә тугрылык рухында тәрбияләүгә дә зур игътибар бирелә.

Бүген шәһәрнең һөнәри белем бирү учреждениеләре урта һөнәри белем бирү системасында үзләренең лаеклы урынын били. Патриотик юнәлештәге проектлар һәм тәрбия чаралары яшьләргә ил тарихын һәм аның бүгенгесен тирәнрәк аңларга, җәмгыять тормышында актив катнашырга мөмкинлек бирә.

Педагог хезмәтенең иң зур нәтиҗәсе — белемле генә түгел, үз иленең киләчәге өчен җаваплылык тоя торган яшь буын тәрбияләү. Түбән Кама көллиятләре җитәкчеләренең абруйлы бүләккә лаек булуы да әлеге юнәлештәге хезмәтнең әһәмиятен күрсәтә.