Түбән Камада «Гаилә автобусы: гореф-гадәтләр – юлга» проекты кысаларында очрашу узды. Аның максаты – яшь гаиләләргә дә, озак еллар бергә яшәүче парларга да комплекслы ярдәм күрсәтү.

Төрле өлкә белгечләре ата-аналар белән уртак тел табу, ир белән хатын арасындагы мөнәсәбәтләрне ныгыту юллары турында сөйләде.

«Проектның төп максаты — районнарга чыгып, гаиләләргә турыдан-туры, нәтиҗәле ярдәм күрсәтү. Команда составына психолог, юрист, акушер-гинеколог, репродуктолог кебек төрле өлкә белгечләре керә. Районнарда һәм авыл җирлекләрендә яшәүчеләр өчен башкалага барып консультация алу һәрвакытта да мөмкин түгел, чөнки еш кына вакыт та, мөмкинлекләр дә чикле. Шуңа күрә белгечләр ярдәмне үзләре урыннарга барып күрсәтә», — диде Татарстан министрлар кабинетының ЗАГС идарәсе җитәкчесе Эльвира Әхмәтова.

Очрашуда 50дән артык кеше катнашты, 4 гаилә шәхси консультация алды. Кабул итү аерым бүлмәләрдә, алдан билгеләнгән вакыт буенча оештырылды, шуңа күрә килүчеләргә чиратта торырга туры килмәде.

Проект республика рәисе гранты ярдәмендә гамәлгә ашырыла. «Гаилә автобусы» Татарстанның биш шәһәрен — Чистай, Яшел Үзән, Түбән Кама, Алабуга һәм Әлмәтне урап узачак.

Моннан тыш, программаның дәвамы буларак «Гаилә стартта» марафоны үткәрү планлаштырыла. Анда һәр районнан кимендә биш гаилә катнашыр дип көтелә.