Бүген Түбән Кама мэры җитәкчелегендәге комиссия йорт подвалларын карап чыкты. Радмир Беляев белдерүенчә, халыкка хәбәр итү системалары һәм вакытлыча яшеренү урыннары тулысынча әзер булырга тиеш.

Шинчылар проспектындагы 1нче йорт. Аның диварында «Яшеренү урыны» дип язылган. «Әйбәт» идарәче компания җитәкчесе Мөнир Шәяхмәтов подвалның әзерлеген күрсәтте.

«Подвалда кирәкле барлык шартлар тудырылган: эскәмияләр, эчәр су, мәгълүмат тактасы һәм беренче ярдәм өчен аптечка бар», — дип белдерде «Әйбәт» идарәче компания җитәкчесе Мөнир Шәяхмәтов.

Шул ук вакытта, шәһәрдә кайбер йортларның подваллары вакытлыча яшеренү өчен яраксыз дип табылган. Табиев урамындагы йортлар шундыйлардан. Радмир Беляев сүзләренчә, хәзер юл картасы эшләнә, шуның ярдәмендә куркыныч вакытында түбәнкамалылар кая сыенырга мөмкин икәнен беләчәк.

«Уяулык һәркайда булырга тиеш: сәүдә үзәкләрендә, җир асты паркингларында, торак йортларда. Аеруча балалар бакчалары, мәктәпләр һәм хастаханәләр игътибар үзәгендә, тиешле регламент буенча эшлибез», — диде Радмир Беляев.

Тикшерү нәтиҗәләре буенча ачыкланган җитешсезлекләрне бетерү өчен чаралар күреләчәк.