Татарстан Республикасы көне уңаеннан Түбән Кама ЗАГС идарәсендә истәлекле чара оештырылды. Биредә 13 яшь гражданга Россия Федерациясе паспортлары тантаналы шартларда тапшырылды.

Яшүсмерләр өчен бу көн аеруча истәлекле булды. Алар төп документларын — Россия Федерациясе гражданины паспортларын алдылар, символик «гражданлык өлгерлегенә сынау»да катнаштылар һәм Россия гражданины антын бирделәр.

Тантанада катнашучыларны Түбән Кама муниципаль районы Башкарма комитеты җитәкчесе урынбасары Александра Офицерова котлады.

«Хөрмәтле әти-әниләр, бүген сезнең гаиләләрегез өчен үзенчәлекле көн, балаларыгыз беренче документларын — РФ гражданины паспортын ала. Паспорт — ул документ кына түгел, ә үз илеңә караганлыгыңны раслау һәм җаваплылык символы. Безнең уртак киләчәгебез сезнең нинди гамәлләр кылуыгызга, үз шәһәрегез, республикабыз һәм илебез үсешенә нинди өлеш кертүегезгә бәйле. Бүген кемнеңдер безнең өчен дөньяны үзгәртүен көтеп тормаска, ә үзегез киләчәкне төзүчеләр сафына басарга кирәк», — дип белдерде Александра Офицерова.

Чара ахырында «Беренчеләр хәрәкәте» вәкилләре яшь гражданнарны котлады. Яшүсмерләргә истәлекле бүләкләр — паспорт өчен тышлыклар һәм түштамгалар тапшырылды.