Яңа уку елы алдыннан Татарстан Дәүләт автоинспекциясе юлларда куркынычсызлык кагыйдәләрен үтәүнең мөһимлеген искәртте. Идарә башлыгы вазифаларын вакытлыча башкаручы Айрат Сәмигуллин балалар иминлегенә аеруча игътибар бирергә чакырды.

Республикада балалар катнашындагы юл-транспорт һәлакәтләрен киметүгә юнәлдерелгән «Игътибар — балалар!» профилактик чарасы үткәрелә. Аның кысаларында автоинспекторлар төрле юнәлешләрдә эш алып барачак. Аерым алганда, балигъ булмаган пассажирларны автомобильләрдә йөртү кагыйдәләренең үтәлешенә контроль көчәйтеләчәк. Шулай ук машина йөртүчеләрнең җәяүлеләргә юл бирмәү очракларын ачыклау һәм кисәтүгә юнәлдерелгән чаралар уздырылачак.

Моннан тыш, Дәүләт автоинспекциясе хезмәткәрләре балалар белән юлдагы куркынычсызлык мәсьәләләре буенча профилактик очрашулар үткәрәчәк. Яшь юл хәрәкәте катнашучылары белән махсус дәресләр һәм аңлату эшләре оештырылачак. Автоинспекторлар шулай ук ата-аналар җыелышларында һәм мәктәпләрнең педагогик коллективлары белән очрашуларда катнашачак.

«Мин транспорт чаралары белән идарә итүчеләргә мөрәҗәгать итәм: торак зоналарында, мәгариф оешмалары янында, алар янындагы территорияләрдә һәм балалар күп йөри торган урыннарда тизлекне киметергә һәм яшь җәяүлеләрнең көтмәгәндә юлга килеп чыгуына әзер булырга кирәк. Җәяүлеләр кичүе, маршрут транспорт чаралары тукталышлары һәм ишегалларыннан чыгу урыннары янындагы участокларга аеруча игътибар бирергә кирәк. Яңа уку елы балаларыбыз өчен шатлыклы, нәтиҗәле һәм, иң мөһиме, имин булсын!», — дип белдерде Айрат Сәмигуллин.