Красный Ключ дамбасы аша бакчачылык ширкәтләренә илтүче юлны төзекләндерү тәмамланды. Өч этапта барлыгы 5 чакрымга якын юл яңартылды. Бу үзгәрешне 10 меңнән артык бакча участогы хуҗасы күптән көтте.

Яңартылган юлны ачу тантанасы йөк машиналары колоннасы хәрәкәте белән башланды. Дамба аша узган трасса меңләгән бакчачы өчен мөһим транспорт юлы булып тора.

«Участок алганнан бирле бу юлның яңартылуын бик озак көттек. Ясарбыз дип вәгъдә иткәннәр иде, без дә ышанып тордык. Ниһаять, хыялыбыз тормышка ашты», — дип сөйләде бакчачы Галия Тимганова.
«Бу юлларны күптән көттек. Элек алар бик начар хәлдә иде, йөрү авыр булды. Хәзер бакчага барып кайту җиңелрәк һәм тизрәк булачак», — ди бакчачы Рагунат Самиев.

Төзекләндерү өч этапта башкарылды. 2024 елда 700 метрдан артык, 2025 елда 1 километр 640 метр юл яңартылды. Быел исә 2 километр 58 метр озынлыктагы соңгы участок тәртипкә китерелде. Эшләр республика программасы кысаларында алып барылды.

Юлны «Татавтодор» компаниясе төзекләндерде. Түбән Кама муниципаль районы башлыгы Радмир Беляев юл төзүчеләргә башкарган хезмәтләре өчен рәхмәт белдерде һәм аларны һөнәри бәйрәмнәре белән котлады. Ул шулай ук район чикләрен үзгәртүгә кагылышлы планнары белән уртаклашты.

«Мин күргән үзгәрешләргә бик шатмын. Ел ахырына кадәр Алабуга районыннан үз территориябезне кире кайтарырга планлаштырабыз. Бу безгә төрле программаларда катнашу мөмкинлеге бирәчәк», — дип белдерде Радмир Беляев.

Дамба юлын яңарту бакчачылык ширкәтләренә баруны уңайлырак итәчәк. Алда — эчке юлларны төзекләндерү һәм инфраструктураны үстерү бурычы.