31 октябрьдә Татарстанның Тукай районында «Яр Чаллы – Түбән Кама» – Иштирәк автомобиль юлы капиталь ремонттан соң ачылды.

Бу участок Түбән Кама районының сәнәгать предприятиеләре өчен аеруча мөһим. Ул Иштирәк авылын М-12 федераль трассасы белән тоташтыра, шулай ук Тукай һәм Түбән Кама районнары арасында юл элемтәсен яхшырта. Моннан тыш, нефть объектларына баруны җиңеләйтә һәм төбәк предприятиеләренең йөк ташу эшен җайга салырга ярдәм итә.

«Элек йөк машиналарына М-12 трассасына Түбән Кама шәһәре аша чыгарга туры килә иде. Бу шәһәр урамнарына өстәмә йөкләнеш тудырды, бөкеләргә китерде. Хәзер маршрут кыскарак һәм уңайлырак булачак. Предприятиеләр өчен йөк ташу шартлары яхшыра, ә шәһәр урамнарында авыр йөк машиналары азрак йөриячәк», – дип билгеләп үтте Түбән Кама мэры Радмир Беляев.

отремонтированная дорога в селе Иштеряково

Юлчылар барлыгы 1,8 чакрым юлны яңарткан. Ремонт «Тормыш өчен инфраструктура» илкүләм проекты кысаларында башкарылган. Эшләргә 57 миллион сум акча бүлеп бирелгән.