Бу программа мәктәп укучылары һәм аларның ата-аналары, югары уку йортларын тәмамлаучылар һәм педагоглар өчен эшләнгән.

Төбәкнең барлык 45 муниципаль районында үткәрелгән бу инициативаның төп максаты – яшүсмерләр һәм яшьләр арасында экстремистик һәм террорчылык юнәлешле идеяләрнең таралуын профилактикалау.

Өч атна дәвамында 128 төрле чара оештырылды, аларда 10 940 кеше катнашты. Программа бай эчтәлекле: цифрлы гигиена нигезләрен, диверсия эшчәнлеге өчен каралган җинаять җаваплылыгын, деструктив төркемнәр тарафыннан вербовкалаудан саклану юлларын, депрессия һәм суицидаль халәтләрне профилактикалау чараларын, шулай ук манипуляция ысулларын һәм алардан ничек котылырга кирәклеген өйрәнү.

Татарстанда террорчылыкка каршы комиссия аппараты җитәкчесе Илдус Гәрәев әйтүенчә, мөһим бурыч – яшьләрне диверсия-террорчылык эшчәнлекләренә тартуны кисәтү һәм аларда террорчылыкка каршы торуның ныклы фикерләвен формалаштыру. «Татарстан рәисе Рөстәм Миңнеханов республиканың һәр укучысы һәм студенты өчен террорчылыкның җинаятьчел ягын аңлату бурычын куйды. 2024 елдан гамәлгә керетелгән «Конструктив диалог» проекты бу юнәлештә эшләү өчен мөһим корал булып тора», – дип билгеләп үтте Илдус Гәрәев.

Оештырылган чаралар программасы куркынычсызлык темасын төрле аспектларыннан киң колачлап карауны үз эченә алды. Катнашучылар лекцияләр генә тыңлап калмады, ә реаль тормыш хәлләренә дә анализ ясады: манипуляция, вербовка һәм буллингны ачыкларга, шулай ук аларга каршы тору өчен кирәкле ысуллар табарга өйрәнде. Мәктәп укучылары өчен Росмолодежь ярдәме белән цифрлы грамоталылык темасына багышланган квиз оештырылды.

Бу чара катнашучыларга үз белемнәрен интерактив формада бәяләү мөмкинлеген бирде. Оештыручылар басым ясаганча, проектның төп максаты – мәгълүмат җиткерү генә түгел, ә яшүсмерләрне һәм яшьләрне шәхси һәм иҗтимагый куркынычсызлык мәсьәләләренә активрак җәлеп итү. Бу проект «Татарстанның Иҗади яшьләр академиясе» һәм ТР Яшьләр ресурс үзәге гражданлык җәмгыятен үстерүгә Татарстан Рәисе гранты, республиканың террорчылыкка каршы комиссиясе аппараты һәм ТР Яшьләр эшләре министрлыгы ярдәме белән тормышка ашырыла.