Түбән Камада яшәүче 892 кеше республиканың Электрон мактау тактасына кертелгән. Алар арасында шәһәр һәм район үсешенә үз хезмәте белән өлеш керткән журналистлар, мәдәният хезмәткәрләре, җитештерү һәм башка тармак вәкилләре бар. 

Шуларның 21енә таныклыклар «Гаилә» паркында узган Хезмәт һәм батырлык фестивалендә тапшырылды. Лауреатлар арасында журналистика өлкәсендә 35 елдан артык хезмәт куйган Фәрит Имамов та бар. Соңгы ун елда ул «Туган як» газетасын җитәкли. Бу — Түбән Камада татар телендә нәшер ителүче бердәнбер басма. Баш мөхәррир Электрон мактау тактасына кертелүен зур хөрмәт дип бәяли.

«Мин „Туган як“та эшләп бөтен гомеремне шәһәргә багышладым. Аның беренче төзүчеләрен яктырттык, шәһәрнең үсешен күрсәттек. Татарстанның Электрон мактау тактасына эләгүем белән бик шатландым», — диде Фәрит Имамов.

Тагын бер лауреат — Гүзәлия Гыйбадуллина. Ул татар телен, мәдәниятен һәм туган як мирасын саклауга зур өлеш керткән. Татарстанның атказанган мәдәният хезмәткәре, хезмәт ветераны һәм Кол Гали исемендәге милли китапханә мөдире буларак, ул туган якны өйрәнү материаллары белән эшли, сценарийлар әзерли, текстлар редакцияли һәм тәрҗемә итә, китапханә хезмәткәрләренә остазлык итә.

«Минем хезмәтемне, минем иптәшләремнең хезмәтен күреп, Электрон мактау тактасында күрү минем өчен шатлыклы һәм көтелмәгән вакыйга булды», — диде Гүзәлия Гыйбадуллина.

Фестивальдә 21 түбәнкамалыны хөрмәтләделәр. Аларга Электрон мактау тактасына кертелүләрен раслаучы таныклыкларны шәһәр мэры Радмир Беляев тапшырды.

«Түбән Каманың матурлыгы, яшеллеге, төзеклеге — халкыбызның тырыш хезмәте нәтиҗәсе. Шәһәр һәм район халкының уңышлары белән горурланабыз», — диде Радмир Беляев.

Республиканың Электрон мактау тактасы Татарстан Рәисе Рөстәм Миңнеханов карары белән булдырылган. Анда Түбән Кама районында яшәүче 892 кеше урын алган. Хезмәт алдынгыларының фотолары һәм алар турындагы мәгълүмат порталда бер ел дәвамында сакланачак. Аннан соң исемлек яңартылачак.