Түбән Каманың «Нефтехимик» хоккей командасы КХЛ чемпионатының чираттагы Фонбет матчында «Сочи»ны җиңде. «Нефтехим Арена» боз сараенда узган очрашу 5:1 исәбе белән тәмамланды.

Матч 8 сентябрь кичендә узды. Түбән Кама командасы составында Никита Хлыстов, Дамир Җаһфәров, Рафаэль Бикмуллин, Андрей Белозёров һәм Артём Сериков берәр алка кертте. Кунаклардан исәпне Денис Венгрыжановский ачты.

Уеннан соң узган матбугат очрашуында «Нефтехимик»ның баш тренеры Игорь Гришин матчның җиңел булмавын билгеләп үтте.

«Уен җиңел булмады. Көндәш беренче минуттан ук актив уйнады. Без кайбер хаталар җибәрдек. Беренче алканы кертүебез командага ышаныч бирде. Шуннан соң уенны үз кулыбызга алып, күбрәк һөҗүм итә башладык. Минемчә, хәлиткеч мизгел — көндәш уенчысы штраф алгач, күпчелектә уңышлы уйнап, гол кертүебез булды», — дип белдерде ул.

«Нефтехимик» киләсе матчын 11 сентябрьдә үз бозында Екатеринбургның «Автомобилист» командасына каршы үткәрәчәк.