Турнирның төп катнашучылары — үзенчәлекле балалар. Аларның мөмкинлекләре чикле булса да, сәләтләре чиксез булуын бу ярыш тагын бер кат раслады. Өстәвенә, турнир Халыкара балаларны яклау көненә туры килүе белән дә үзенчәлекле булды.

«Без бик шат. Бүген улым белән килдек. Уйнарга, катнашырга мөмкинлек тудырганнары өчен бик зур рәхмәт», — дип уртаклашты чара кунакларының берсе.

Оештыручылар сүзләренчә, мондый форматтагы спорт фестивале шәһәрдә беренче тапкыр үткәрелә.

«Михаил Сергачев белән берлектә бик матур спорт бәйрәме оештырдык. Монда футбол, баскетбол һәм зур теннис мәйданчыклары эшләде. Катнашучылар да, җанатарлар да күп. Түбән Кама — спорт традицияләре көчле шәһәр, һәм моны бүген ачык күрергә мөмкин», — дип билгеләп үтте турнирның алып баручысы Диана Ахунова.

Баскетбол ярышларында кызлар һәм егетләрдән торган 16 команда көч сынашты. Һәр команда — дүртешәр кеше. Спортчыларны трибуналардагы җанатарлар дәртләндереп торды.

Турнир чын мәгънәсендә спорт һәм сәламәт яшәү рәвеше бәйрәменә әверелде. Кунаклар өчен фотобудка, аниматорлар һәм төрле күңел ачу зоналары эшләде. Ярышларда җиңү яулаучылар һәм призлы урыннар алган катнашучылар медальләр һәм кубоклар белән бүләкләнде.

Бүген «Сектор 98» хәйрия фонды Түбән Камада берничә социаль әһәмияткә ия проектны гамәлгә ашыра. Аларның төп максаты — спорт инфраструктурасын үстерү һәм сәламәтлек мөмкинлекләре чикле булган балаларга ярдәм күрсәтү.