Сәламәтлек

Сәламәт яшәү рәвешен алга сөрүгә юнәлдерелгән әлеге чара 2015 елдан бирле үткәрелеп килә. Ул йөрәк-кан тамырлары системасын ныгыту, физик активлыкны арттыру максатыннан оештырыла, җәяү йөрүне популярлаштыра. Сәламәтлекне саклау өчен кыйммәтле тренажерлар да, спорт заллары да кирәкми — физик активлык, гади җәяү йөрү дә бик файдалы, ди оештыручылар.

«Гаилә» паркы территориясендә бу көнне флюоромобиль эшләде. Шулай ук теләгән һәркем ВИЧ-инфекциягә һәм С гепатитына бушлай экспресс-тестлар ясата алды.

«Казаннан тест-мобиль чакырдык. Тикшерү нәтиҗәләре ун минут эчендә билгеле була. Бүгенге чара „Җәмәгать сәламәтлеге һәм медицина профилактикасы үзәге“ тарафыннан оештырыла, безгә мәдәният һәм спорт идарәләре зур ярдәм күрсәтә. Шулай ук „Беренчеләр хәрәкәте“ волонтерлары һәм медицина көллияте студентлары да булыша», — диде «Җәмәгать сәламәтлеге һәм медицина профилактикасы үзәге» баш табибы Илмир Вазиков.

Стартка чыкканчы түбәнкамалылар биеп, гимнастика ясап, буыннарын яздырдылар. Паркта бәйрәм рухы хөкем сөрде. Әлеге чарага барлыгы ике йөзләп кеше җыелды. Чара төрле яшьтәге спорт сөючеләрне берләштерде.

«Һәрберебезнең сәламәтлеге үз кулыбызда. Бүгенге акция — моңа ачык дәлил. Монда җиңелүчеләр юк, барыгыз да — җиңүчеләр. Без сәламәтлек өчен генә түгел, ә бердәмләшү, күмәкләшү өчен дә җыелдык. Без бергә һәм без тату. Бу бик мөһим», — дип ассызыклады Түбән Кама районы сәламәтлек саклау идарәсе җитәкчесе Эльза Гыйльметдинова.

Һава торышы карлы, салкынча булуга карамастан, акциядә катнашучыларның кәефе күтәренке иде. Сәламәт яшәү рәвешен хуплаучылар бу чарада даими катнаша. Гомумән, акция ел дәвамында ике тапкыр үткәрелә.

Медицина тикшерүе дә уздылар // Автор фотолары
Медицина тикшерүе дә уздылар // Автор фотолары

«Мин әлеге акциядә һәрвакыт катнашам, бик ошый. Хәзер бөтен пенсионерларны җыябыз да стартка чыгабыз. Сәламәтлек өчен бик файдалы. Өйдән чыгып киткәндә хәлем әллә ни яхшы түгел иде, ә хәзер саф һавада яхшырып китте. Җыелган халыкны, дусларны күргәч, тагын да дәрт артты», — ди Тәгъзимә Садыйкова.

Бу көнне акциядә катнашучылар 10 мең адымлык дистанцияне җәяү уздылар. Әлеге чара яшәү сыйфатын арттыруга һәм җәмгыятьнең сәламәтлеген ныгытуга зур өлеш кертә.