24 апрель көнне Түбән Каманың Үзәк мәчетендә дә татарча диктант яздылар. Әлеге чара инде шактый еллар дәвам итеп, төрле яшьтәге һәм һөнәрдәге кешеләрне берләштерә, татар телен саклап калу һәм үстерүдә зур өлеш кертә.

Быелгы диктант бөек татар шагыйре Габдулла Тукайның тууына 140 ел тулуга багышланды һәм текст өчен аның әсәрләреннән өзекләр кулланылды.

Бу чара мәчеттә гадәттәгечә уза һәм аны туган телен һәм мәдәни үзенчәлекне саклау өчен чын күңелдән көрәшүче тәҗрибәле укытучы Әлфия Әхмәтҗанова үткәрә. Ул махсус бланкны дөрес тутырырга булышты, текстны укыды, чөнки диктант үткәрү беркетмәсе шуны таләп итә, чарада кирәкле дисциплина һәм тәртип урнаштырды.

Мәчеттә барлыгы 32 кеше диктант язды. Аның билгеләрен соңрак, махсус сайтка кереп белеп булачак.