Проект узган ел көзендә, Украинада баручы махсус хәрби операциядә һәлак булган сугышчыларның әти-әниләре һәм якыннары инициативасы белән башланып, өч дистә фотопортрет җыюдан торган. Бүген инде 135 портрет әзерләнгән, дип хәбәр итте Түбән Кама телерадиокомпаниясе корреспонденты А. Комаровның әнисе Венера Васильевна, музей һәм дәүләт архивы хезмәткәрләренә рәхмәтен белдереп.
Фотографияләр арасында 11 нче мәктәпне тәмамлаган дүрт герой бар: Станислав Кузьмин, Кирилл Нагорнов, Максим Дмитриев һәм Павел Петров. Алар барысы да Россия Президенты Указы нигезендә «Батырлык өчен» ордены белән бүләкләнгәннәр (үлгәннән соң).
Кичәдә шәһәр ветераннар советы урынбасары В. Филиппов һәм запастагы майор П. Данилов чыгыш ясап, үзләренең хәрби тәҗрибәләре һәм фронтта хезмәт иткән чактагы истәлекләре белән уртаклаштылар. Павел Борисовичның улы Вадим да махсус хәрби операциядә һәлак булган — ул контракт нигезендә фронтка китә һәм 2023 елның 26 январендә вафат була.
Проектны тормышка ашыруда 6, 8, 9 һәм 11 нче микрорайоннарның үзидарә советы вәкилләре актив катнашкан, ә «Мәрхәмәтле йөрәкләр» волонтер оешмасы җитәкчесе Л. Орлова соңгы елда алар ярдәме белән 50 тоннадан артык гуманитар йөк җыеп җибәрүләрен әйтте.
Кичә концерт белән тәмамланды: 19, 22, 24 нче балалар бакчасы һәм Г. Сафиуллин исемендәге Татарстан кадетлар корпусы җыр коллективлары чыгыш ясады. Тамашачыларны бигрәк тә кечкенә «йолдыз» Айсель Сәгыйтова һәм 18 нче мәктәп укучысы Рузил Хәбибуллинның чыгышлары әсир итте. Концертны китапханәче Ирина Андреева һәм махсус хәрби операция ветераны, шагыйрь Дмитрий Пустовалов алып бардылар, ә аның «Үзебезнекеләрне ташламыйбыз!» һәм «Донбасс» шигырьләре тамашачылардан зур алкышлар алды.
«Россиягә тугры уллар» фотопроект күргәзмәсе якын арада башка уку йортларында да оештырылачак, һәм Кама Аланы, шулай ук районыбызның башка төбәкләрендә дә геройлар белән таныштыру чаралары планлаштырыла.
MAX
