Концерт алдыннан музыкант аппаратура тавышын көйләде. Дамир Гаффаров үзе уйнаган инструментларның яңгырашыннан канәгать калуын әйтте. Ул фингерстайл техникасында чыгыш ясый. Бу алым гитара ярдәмендә берьюлы берничә музыка коралын — бас-гитараны, перкуссияне, вокал элементларын — имитацияләргә мөмкинлек бирә.

— Фингерстайл — ул гитарада музыкаль фикерне генә түгел, тамашачыны гаҗәпләндерә торган шоу элементларын да берләштергән стиль. Бу күзгә дә бик эффектлы күренә, тыңларга да рәхәт, — дип сөйләде Дамир Гаффаров.

Яшь музыкант Яр Чаллы шәһәрендә яши. Түбән Камада чыгыш ясау тәкъдимен ул бик теләп кабул иткән. Хәзерге вакытта Дамир бик еш концертлар бирә, үз иҗатына яңа тыңлаучылар җәлеп итә.

— Минем хәтта үз шигарем дә бар: «Мин — Дамир Гаффаров, һәм мин сезгә гитараның чын мөмкинлекләрен күрсәтәм!» Бүгенге программаның төп максаты — гитараның бөтен матурлыгын ачу. Без лирик көйләр дә, рок, джаз һәм поп-музыка элементлары да уйныйбыз. Программада Майкл Джексоннан башлап Леонид Агутинга кадәр төрле артистларның әсәрләре яңгыраячак, — диде ул.

Музыкаль чыгышлары арасында Дамир тамашачыларга гитарада уйнау буенча киңәшләр дә бирде, кыска осталык дресләре дә үткәрде.

Концерт экстрим-паркның керү урынындагы төп мәйдан булды. Тамашачылар өчен уңайлы урындыклар һәм йомшак креслолар әзерләнгән. Шул ук вакытта кунаклар экстремаль спорт белән шөгыльләнүчеләрнең чыгышларын да күзәтә алды.

«Айда» экстрим-паркы җитәкчелеге мондый иҗади чараларны киләчәктә дә ешрак үткәрергә ниятли.

— Бездә гаилә белән ял итү өчен бик уңай мохит тудырылган: балалар шуа, әти-әниләр күңелле ял итә. Быелгы сезон концепциясе бик уңышлы килеп чыкты, — дип билгеләп үтте парк директоры урынбасары Гүзәл Сибгатуллина.

Концерт йөздән артык музыка сөючене җыйды. Дамир Гаффаров исә түбәнкамалыларны үз иҗаты белән әле тагын берничә тапкыр сөендерергә вәгъдә итте.