Очрашуга 12 кеше килгән.

Тренинг барышында катнашучыларга үз хисләре турында ачык итеп сөйләү, эчләрендә җыелып килгән борчуларны, сызлануларны уртаклашу мөмкинлеге бирелде. Гадәти тормышта еш кына әйтелми кала торган уй-кичерешләр монда яңгыраш тапты. Ышаныч һәм үзара аңлашу мохите хатын-кызларга күңел бушатырга гына түгел, ә башкаларның язмышын тыңлап, үзләренең ялгыз түгеллеген аңларга да ярдәм итте.

«Мин үземә терәкне әти-әниемдә таптым — алар миңа үз эчемә бикләнеп калырга юл куймады», — дип уртаклашты катнашучыларның берсе.

Очрашуда катнашкан һәркемнең үз кайгысы, үз борчулары. Күпләр якын кешесен югалту хәсрәте белән яши. Резедә Шишкинаның улы инде бер ел хәбәрсез югалганнар исемлегендә. Бүген ул ике оныгын тәрбияли. Үзенә көчне ул волонтерлык эшчәнлегендә таба.

Резедә ханым мондый очрашуларны бик файдалы дип саный. Аның фикеренчә, биредә кеше рухи терәк кенә түгел, ә яңа танышлар да таба, һәм бу кайгыны җиңелрәк кичерергә ярдәм итә. Аның белән башка катнашучылар да килешә.

«Бу очрашулар игътибарны башка якка юнәлтә — начар уйларга вакыт калмый. Әлбәттә, миңа да авыр: искә төшсә, елыйм. Әмма шуңа гына ябышып ятарга ярамый. Ниндидер эшкә чумарга кирәк», — ди Резедә Шишкина.
«Мондый чаралар кешегә яңадан көч тупларга, алга барырга, вәзгыятьне аңларга ярдәм итә. Югалтуның беренче айлары — иң авыр чор, һәм нәкъ менә шушы вакытта ярдәм аеруча кирәк», — дип билгеләп үтә һәлак булган сугышчының хатыны Мария Мендирова.

Оештыручылар сүзләренчә, мондый очрашуларда иң мөһиме — кешене ишетүләре һәм аңлаулары. Нәкъ менә шушы хис күпләр өчен беренче терәк ноктасына, эчке тигезлекне табу юлына әверелә.

«Бүген килгән кешеләрнең кайберләре мондый чарада беренче тапкыр катнаша. Алар кабат килерләр дип уйлыйм, чөнки биредәге җылылыкны тоялар», — ди «Пчёлки» волонтерлар төркеме җитәкчесе Разилә Шәмсетдинова.

Очрашу ахырында хатын-кызлар имбирь печеньеларын төсле глазурь белән бизәде. Һәркем бу эшкә иҗади якын килде, шуңа күрә тәм-томнар да төрле, үзенчәлекле килеп чыкты. Әлеге печеньеләрне алар шәһәр Сабантуенда сатарга әзерләде, ә җыелган акчалар фронт өчен кирәкле әйберләр сатып алуга тотылачак.