Үрнәк гаиләләрне хөрмәтләделәр

Шәһәр паркларының берсендә Гаилә, мәхәббәт һәм тугрылык көне киң колач белән билгеләп үтелде. Бәйрәм төрле буын вәкилләрен берләштерде, ә төп игътибар гаилә кыйммәтләрен саклаучы һәм күпьеллык уртак тормыш юлы үткән парларга юнәлтелде.

Бәйрәмнең иң дулкынландыргыч мизгелләренең берсе — «Мәхәббәт һәм тугрылык өчен» медальләрен тапшыру тантанасы булды. Әлеге абруйлы бүләк озак еллар буе гаилә кыйммәтләренә тугры калып, балалар тәрбияләүгә һәм Җәмгыятьтә ныклы гаилә традицияләрен ныгытуга зур өлеш керткән парларга бирелә. Быел Түбән Камада лаеклылар исемлегенә алты үрнәк гаилә керде. Алар арасында «Татмедиа» АҖ филиалы «Түбән Кама-информ» хезмәткәре — «Туган як» газетасының баш мөхәррире Фәрит Имамов һәм тормыш иптәше Елизавета ханым да бар. Алар урта мәктәптә бер сыйныфта укыганнар, студент елларында гаилә корганнар, быел исә уртак тормышларының 44 еллыгын билгеләп үтәләр. Ирле-хатынлы Имамовлар хезмәттә дә, Җәмәгать эшләрендә дә актив катнашып, яшь буын өчен татулыкның, үзара хөрмәтнең һәм тугрылыкның матур үрнәген күрсәтә.

Бәйрәм яшьләр өчен дә истәлекле вакыйгага әверелде. Рөстәм һәм Аделина Сәйфетдиновлар нәкъ шушы көнне никахларын рәсмиләштереп, уртак тормышларына рәсми рәвештә старт бирде. Яшьләр Түбән Камада танышкан. Рөстәм сәнәгать предприятиесендә хезмәт куя, ә Аделина шәфкать туташы булып эшли.

Түбән Кама шәһәре мэры урынбасары Марина Камелина бәйрәм кунакларын котлап, гаиләнең Җәмгыять өчен әһәмиятен ассызыклады.

— Бүген без шәһәребезнең зур гаилә икәнен тагын бер кат раслыйбыз. Түбән Кама инде 60 ел бердәм булып төзелә һәм үсә. Бу бәйрәмнең нәкъ менә кешеләрне берләштерә торган «Гаилә» паркында узуы да тирән мәгънәгә ия, — диде ул.

Бәйрәм кысаларында күп балалы гаиләләргә махсус таныклыклар тапшырылды. Кунаклар өчен осталык дәресләре, спорт уеннары, иҗат мәйданчыклары һәм концерт программасы оештырылды. Җирле иҗат коллективларының чыгышлары тамашачыларның Җылы алкышларына күмелде, ә бәйрәм ахырында бөтен парк артистлар белән бергәләп Җырлады. Шулай итеп, Гаилә, мәхәббәт һәм тугрылык көне шәһәр халкын тагын бер кат уртак кыйммәтләр тирәсенә берләштергән Җылы һәм истәлекле вакыйгага әверелде.