Хәзерге вакытта Түбән Кама районында социаль яклау өлкәсендә 450дән артык белгеч хезмәт куя. Аларның фидакарь хезмәте нәтиҗәсендә меңләгән кеше — өлкәннәр, күп балалы гаиләләр, махсус хәрби операциядә катнашучылар, шулай ук сәламәтлек мөмкинлекләре чикле гражданнар — кирәкле ярдәм һәм игътибар ала.

Тантанада Татарстан Республикасы Хезмәт, мәшгульлек һәм социаль яклау министры урынбасары Клара Таҗетдинова чыгыш ясады.

«Социаль хезмәткәр булу — ул һөнәр генә түгел, ә чын мәгънәсендә тормыш юлы. Бу эш зур сабырлык һәм кеше язмышына битараф булмауны таләп итә. Биредә утыручыларның һәркайсының йөрәге алтын. Без катлаулы, әмма бик әһәмиятле эш башкарабыз — кешеләргә якты киләчәккә өмет бүләк итәбез. Сез биргән игелек үзегезгә меңе белән әйләнеп кайтсын», — диде ул.

Чараның тантаналы өлешендә нәтиҗәле хезмәтләре өчен 40ка якын хезмәткәр бүләкләнде. Аларга республика һәм җирле дәрәҗәдәге Мактау грамоталары һәм Рәхмәт хатлары тапшырылды.

Социаль хезмәткәрләр — җәмгыятьнең иң кирәкле һәм мәрхәмәтле һөнәр ияләре. Аларның игелекле хезмәте кешеләргә ышаныч һәм өмет бирә.