Балаларны якыннары озатып калды. Кулларында — сумкалар, йөзләрендә — елмаю, ә планнары — зурдан. Малайлар һәм кызларны алда файдалы һәм кызыклы ял көтә.

«Бу „Туган як“ сменасына балаларны зур теләк белән җибәрәбез. Алар яңа дуслар табып, яңа белемнәр туплап кайтсыннар. Минем зур балаларым да анда ял иттеләр. Хәзер кечкенәсен дә озатабыз. Без „Туган як“ны бик яратабыз, алар саф һавада сәламәтлекләрен ныгытып кайталар. Аллаһның рәхмәте булсын оештыручыларга“, — дип билгеләде Гөлнара Мифтахова.

Смена программасы күпкырлы итеп төзелгән. Биредә саф һавада спорт уеннары, төрле осталык дәресләре һәм тәрбияви чаралар үткәреләчәк. Шулай ук балалар татар халкының гореф-гадәтләре белән танышачак, күренекле шәхесләр иҗатын өйрәнәчәк һәм туган як тарихы белән танышачак.

«Программада уеннар да, мастер-класслар да, тәрбияви чаралар да каралган. Балаларны үзебезнең гореф-гадәтләр рухында тәрбияләүгә зур игътибар бирелә», — ди «Туган як» профильле сменасын оештыручы Хәлил хәзрәт Хәйбрахманов.

«Туган як» сменасы Татарстанда милли юнәлешкә нигезләнгән уникаль проектларның берсе булып тора. Ул балаларга вакытны файдалы һәм мавыктыргыч итеп үткәрү генә түгел, ә рухи яктан баеп, яңа белемнәр алу мөмкинлеге дә бирә.