Чистай, Алабуга, Яшел Үзән һәм башка район-шәһәрләрдән барлыгы 58 команда килгән. Бу – муниципаль этапларда җиңеп чыккан 232 яшь юл хәрәкәте инспекторы. Күркәм традиция буенча, конкурсның финалы нәкъ менә «Камский Артек»та уза. Бәйгенең исә тарихы инде 32 елга сузыла.

Катнашучыларның кәефе күтәренке.

«Бу конкурска бер ел әзерләндек, кәефләр шәп», – дип уртаклашты Аксубай районыннан килгән Райнур Гатауллин.

Ачылыш тантанасында Дәүләт автоинспекциясе идарәсе башлыгы урынбасары Дамир Бикмөхәммәтов катнашучыларны сәламләде һәм уңышлар теләде. Өч көн дәвам итәчәк программа бик бай. Катнашучылар теоретик белемнәрен тикшерәчәк, юл хәрәкәте кагыйдәләре буенча сорауларга җавап бирәчәк. Шулай ук беренче медицина ярдәме күрсәтү күнекмәләрен һәм велосипед белән идарә итү осталыкларын да сынап караячаклар.

«Бу ярышларның әһәмияте зур. Балалар белемне үзләре өчен генә түгел, ә әйләнә-тирәдәгеләр белән дә уртаклашалар, юл хәрәкәте иминлеге культурасын киң таратырга ярдәм итәләр. Кызганычка каршы, юлларда балалар катнашында аварияләр һаман да була. Шуңа күрә мондый бәйгеләр бик кирәк – яшьләр тырыша, өйрәнә һәм белемнәрен тормышта куллана», – дип билгеләп үтте «Бердәм Россия» партиясенең Татарстандагы төбәк Башкарма комитеты җитәкчесе Марат Сәмигуллин.

Оештыручылар фикеренчә, бәйгенең нәтиҗәләре 22 майда игълан ителәчәк. Җиңүчеләрне һәм призерларны бүләкләү тантанасы «Адымнар» гимназиясендә узачак.