Табиблар билгеләп үткәнчә, мондый очракларның күбесе кешеләр урманда җиләк җыйганда теркәлә. Моннан тыш, бакча участокларында да елан чагу очраклары күзәтелгән. Еланнар, нигездә, кулны яки аякны чага. Мондый җәрәхәтләрдән соң дәвалану, гадәттә, ике атнага кадәр дәвам итә.

Зыян күрүчеләрнең берсе — 66 яшьлек Светлана. Ул Ключ Труда бистәсе янындагы урманда җиләк җыйганда кара еланга юлыккан. Җиләк өзәргә дип иелгән мизгелдә елан аның кулының баш бармагын чаккан. Ире аны кичекмәстән Түбән Кама үзәк район хастаханәсенә алып килгән.

Табиблар пациентны шунда ук реанимация бүлегенә салган. Аңа кислород терапиясе үткәрелгән һәм кара елан агуына каршы махсус сыворотка кертелгән. Хәзер аның кулы нык шешкән, көчле авыртуы да әле дә саклана. Хатын-кыз табиблар күзәтүе астында кала.