Түбәнкамалылар һәм шәһәр кунаклары арасында зур популярлык казанган «Шәһәрнең мәдәни мохите» проектының бишенче сезоны башланды. Ул «Татнефть» компаниясе ярдәме белән гамәлгә ашырыла.

Сезонны ачып җибәрү тантанасында тамашачыларны Туфан Миңнуллин исемендәге татар дәүләт драма театры артистлары сөендерде. Алар «Мираликундия. Серле гиппопотам» спектаклен тәкъдим итте. Җырлы-биюле әкият дуслык һәм батырлык темаларын яктырта.

«Проект төрле яшьтәге тамашачылар өчен дә кызыклы. Монда кечкенә балалар да, өлкәннәр дә бар, алар әкият дөньясына чума», — дип белдерде Туфан Миңнуллин исемендәге татар дәүләт драма театры артисты Элвира Әсәтова.

«Шәһәрнең мәдәни мохите» проекты бишенче ел гамәлгә ашырыла. Бу вакыт эчендә тамашачылар аны яратып өлгерде. Оештыручылар фикеренчә, ачык һавада мәдәни чаралар шәһәр мохитен баета һәм гаиләләр өчен күңелле ял мөмкинлеге тудыра.

Тамашачылар да проектка уңай бәя бирә:

«Безгә бик ошый, җырлыйбыз, биибез, рәхәтләнеп ял итәбез. Оештыручыларга зур рәхмәт», — дип уртаклашты Зәкирә Дәүләтшина.
«Без шәһәребезнең беренче төзүчеләренә бик рәхмәтле. Алар безгә шундый матур парклар калдырды. Без монда актерларны чакырабыз. Апа-абыйларыбыз рәхәтләнеп матур концертлар карап, җәйге көннәрдә ял итеп утырсын», — дип сөйләде «Шәһәрнең мәдәни мохите» проекты кураторы Люзия Хөснуллина.

Җәй дәвамында һәр җомга һәм шимбә көннәрендә «Гаилә» паркы һәм Лемаев скверы яңгырашлы концертлар һәм тамашалар үзәгенә әйләнәчәк. Бу — «Татнефть» компаниясеннән түбәнкамалыларга җәйге бүләк.