Чарага Татарстанның төрле районнарыннан якынча 90 катнашучы җыелды. Алар 9 компетенция: пластилиннан рәсемнәр иҗат итү, сәнгатьле итеп шигырь уку, сабын кайнату, агачны көйдереп матур бизәкләр төшерү кебек юнәлешләр буенча осталыкларын күрсәттеләр.

«Мондый фестивальләр катнашучыларның тормышын яңарта, төрлеләндерә. Безнең яшьләр бу фестивальдә өченче ел рәттән бик яратып катнашалар, без аларны әзерлибез, һәм ел да призлы урыннар алып кайту аларны бик сөендерә», — дип билгеләп үтте «Рубаха» инклюзив арт-кластер директоры Алсу Зәбирова.

Оештыручылар әйтүенчә, фестивальнең төп максаты — яшьләрне җәмгыятькә җайлаштыру, иҗади сәләтләрен ачу һәм киләчәккә һөнәри юнәлеш бирү.

«Мөмкинлекләр фестивале» республиканың 12 районында үткәрелә һәм ул «Абилимпикс» чемпионаты кысаларында өченче ел рәттән оештырыла. Монда җиңүчеләр һәм җиңелгәннәр дигән катгый бүленеш юк. Барлык катнашучыларга сертификатлар тапшырыла, бу аларның киләчәктә үз юлларын табарга этәргеч булып тора.