Фәнни лабораторияләр, иҗади остаханәләр, спорт мәйданчыклары. Халык иҗаты йорты фойесы тәҗрибәләр уртаклашу мәйданчыгына әверелә. Мәктәпкәчә яшьтәге балалар үзләре өлкәннәргә балалар бакчаларында нәрсәләр белән шөгыльләнүләре турында сөйлиләр.

«Ата-аналарны балалар бакчалары эшчәнлеге белән якынрак таныштырабыз. Максат – мактану түгел, эшебезне күрсәтү. Һәм аларны борчыган сорауларга җавап бирү», – ди Түбән Кама муниципаль районының мәктәпкәчә белем бирү идарәсе җитәкчесе Светлана Андрианова.

Аннары ата-аналар Халык иҗаты йорты залына уздылар. Шәһәркүләм җыелышта катнашучыларны Түбән Кама мэры Радмир Беляев сәламләде. Чыгышында билгеләп үткәнчә, безнең районда мәктәпкәчә белем бирү югары дәрәҗәдә башкарыла.

«Өстенлекле бурыч – балачакка ярдәм итү. Без бу юнәлештә шәһәрдә күп нәрсә эшләргә тырышабыз. Без балалар бакчаларын ремонтлыйбыз, яңа җиһазлар сатып алабыз», – ди Түбән Кама муниципаль районы башлыгы, Түбән Кама мэры Радмир Беляев.

Пленар утырыш ата-аналар белән аралашуга багышланды. Әти-әниләр белгечләргә кызыксындырган сорауларын бирә алдылар. Баланы мәктәпкә әзерләүне нәрсәдән башларга? Аның яхшы укуына, тәртипле булына ничек ирешергә? Киңәшләр әйтелде. Җыелышта 500гә якын ата-ана катнашты. Мондый җыелыш шәһәркүләмендә беренче тапкыр оештырыла.