«Башлангыч сыйныф укучылары өчен беренче ярдәм нигезләре: тәҗрибә, сынаулар, перспективалар» исемле түгәрәк өстәл бу мөһим юнәлешне үстерү буенча ирешелгән уңышларны һәм планнарны фикер алышу мәйданчыгына әверелде. Катнашучылар арасында ТР бала хокуклары буенча вәкиле Светлана Захарова, Казан шәһәр Думасы депутаты Эльвира Наумова, Мәгариф идарәсе вәкилләре, мәктәпләр һәм балалар бакчалары җитәкчеләре, шулай ук «Беренчеләр хәрәкәте» һәм «Добрая Казань» АНО активистлары бар иде.

«Яшь коткаручылар»: беренче уңышлар

«Россия Кызыл Хачы»ның Татарстан төбәк бүлекчәсе башкарма директоры Дмитрий Каменский «Яшь коткаручылар: барысы өчен дә беренче ярдәм!» пилот проектының нәтиҗәләрен тәкъдим итте. Проект кысаларында:

  • 7-10 яшьлек 600дән артык бала белем алды.
  • Практик күнекмәләр Казандагы 6 мәктәптә, шул исәптән 139 нчы һәм 175нче гимназияләрдә, 116нчы лицейда, 156нчы, 101нче мәктәпләрдә һәм 10 нчы татар-рус мәктәбендә үткәрелде.
  • Һәр сыйныф махсус уку җиһазларын кулланып, кимендә 5 практик дәрестә катнашты.
  • Моннан тыш, 192 ата-ана өчен – 12, ә 158 педагог өчен 12 осталык дәресе үткәрелде.

ТРның атказанган укытучысы Валентина Чернявская укыту методикасы турында тулырак сөйләде, анда рольле уеннар, команда квестлары һәм бәйләүләр, жгутлар кую, зыян күрүчене янәшә яткызу кебек күнекмәләрне эшләү керә.

Инклюзия һәм мәктәпкәчә яшьтәгеләр: горизонтларны киңәйтү

Аерым кызыксыну уяткан тәҗрибә – 156нчы мәктәпнеке. Директор Марина Хоменко, махсус белемгә мохтаҗ балалар өчен беренче ярдәм программаларын ничек уңышлы адаптацияләүләре турында сөйләде, уен форматларының һәм индивидуаль якын килүнең нәтиҗәлелеген ассызыклады.

Беренче ярдәм күнекмәләре мәктәпкәчә яшьтәге балалар белән эшләүгә дә уңышлы кертелә. 282 нче балалар бакчасының өлкән тәрбиячесе Миләүшә Ханова, иминлек культурасын иртә яшьтән формалаштыруның уңай тәҗрибәсе турында сөйләде.

«Беренчеләр хәрәкәте» вәкиле Зөһрә Замалтдинова «Значимый взрослый» Бөтенроссия проектын һәм аны мәктәпләрдәге хәвефсезлек программаларына интеграцияләү мөмкинлекләрен тәкъдим итте.

Киләчәккә планнар: масштабны арттыру һәм алга таба үстерү

Актив фикер алышу барышында катнашучылар балалар белән эшләүнең иң нәтиҗәле форматларын, ата-аналарны җәлеп итү юлларын һәм алынган күнекмәләрне саклау ысулларын тикшерделәр.

Түгәрәк өстәлнең йомгагы резолюция булды, ул проектны күбрәк мәктәпләргә таратуны, «Значимый взрослый» проекты белән интеграцияләүне һәм балалар бакчаларының белем бирү процессына беренче ярдәм элементларын кертүне күздә тота.

«Россия Кызыл Хачы»ның Татарстан төбәк бүлекчәсе рәисе Зөлфия Сафина проект кысаларында иң яхшы нәтиҗәләргә ирешкән укытучыларга һәм мәктәпләргә бүләкләр тапшырды. Чара 139нчы гимназиянең уникаль музей объектлары буенча экскурсия белән тәмамланды.

Катнашучылар бертавыштан фикергә килделәр: 7 яшьтән беренче ярдәм күрсәтүгә өйрәнү –мөмкин генә түгел, ә бик кирәкле дә. Нәтиҗәлелеген исбатлаган проект дәвам итәчәк һәм киңәйтеләчәк.