2026 елның 1 сентябреннән Татарстанның 13 мәктәбендә укучыларның тәртибенә бәя бирү сынау рәвешендә кертеләчәк. Алар арасында Түбән Каманың ике уку йорты — 31нче лицей һәм 33нче мәктәп тә бар.

Бу хакта республика мәгариф хезмәткәрләренең август киңәшмәсендә Татарстанның мәгариф һәм фән министры Илсур Һадиуллин хәбәр итте. 

«Укучыларның тәртибе өч төргә бүленеп бәяләнәчәк: „үрнәк“, „канәгатьләнерлек“ һәм „канәгатьләнерлек түгел“. Яңа алым мәктәпләрдә тәртипне яхшыртырга, балаларның җаваплылыгын арттырырга мөмкинлек бирер», — дип белдерде Илсур Һадиуллин.

Яңа уку елында тәртипкә бәя кую системасы шулай ук Казан, Чаллы, Әлмәт, Бөгелмә, Алабуга һәм Лениногорск мәктәпләрендә дә кертеләчәк.