Бакчаларга автобуслар кайчан йөри башлый? Түбән Камада җылыту сезоны тәмамлану вакыты билгеле, мошенниклардан саклануның нәтиҗәле ысулы. Әлеге һәм башка темалар турында бүген шәһәр җитәкчеләренең «эшлекле киңәшмәсе»ндә фикер алыштылар.

Түбән Камада җылыту сезонын 27 апрельдә төгәлләү планлаштырыла. Ул этаплап башкарыла. Башта күпфатирлы йортларда, аннары — социаль учреждениеләрдә. Тагын бер мөһим тема — дача массивларына автобуслар расписаниесе.

«25 апрельдән 11 октябрьгә кадәр 16 маршрут буенча хәрәкәт оештырылачак. 13е автовокзалдан китә. Берсе 22 нче микрорайон тукталышыннан. Кама Аланыннан — икәү. Барлыгы 22 автобус линиягә чыга. Барлык категорияләр өчен ташламалы йөрү саклана», — дип хәбәр итте Түбән Кама муниципаль районы башлыгы урынбасары Александр Умников.

Киләсе чыгыш күпфункцияле үзәк эшчәнлегенә багышлана. Соңгы өч айда 120 меңнән артык мөрәҗәгать кабул ителгән. Эчтәлекләре төрле.

«Мошенниклардан саклану өчен халыкка төрле хезмәтләр күрсәтәбез. Мәсәлән, кредит бирүгә тыю. Механизмны „тоташтыру“ өчен үзеңнең кредит тарихына „Дәүләт хезмәтләре“ порталы яки күпфункцияле үзәк аркылы гариза тапшырырга кирәк», — дип чыгыш ясады күпфункцияле үзәге җитәкчесе Илсөяр Әхтәмова

Киңәшмәгә шулай ук буллинга каршы программа тәкъдим ителде. Түбән Камада әлеге юнәлеш буенча колачлы эш алып барыла. Узган атнада зур форум узды. Хәзер иң мөһим — балаларның җәйге ялын оештыру, яшүсмерләрне эшкә урнаштыру мәсьәләсенә игътибарны көчәйтү, дип билгеләп үтте Түбән Кама муниципаль районы башлыгы урынбасары.