Аның максаты — сулыкларда фаҗигале очракларны булдырмау. Хәзер белгечләр тәүлек әйләнәсе кизү тора.

Язгы боз ястык калынлыгы булса да ышанма, дип әйтеп-кисәтеп торсалар да, күп кенә балыкчылар моны колакларына да элми, ди белгечләр. Шуңа да Кече суднолар буенча дәүләт иснпекциясе белгечләре яңа эш режимына күчә.

«Дүшәмбедән Красный Ключ бистәсендә вакытлыча пост эшли башлады. Сулыкларда коткаручылар һәм ГИМС хезмәткәрләре тәүлек әйләнәсе кизү тора. Аларның зур ярдәмчесе — Хивус-6 махсус техникасы, ул боз буйлап хәрәкәт итә ала. Гадәттән тыш хәлләр вакытында урынга шуның белән чыгалар», — ди Россия гадәттән тыш хәлләр министрлыгының ТР буенча ГИМС үзәгенең Түбән Кама инспекторлык бүлеге җитәкчесе Дмитрий Трубин.

Белгечләр карамагында — Алабугадан Кама Аланына кадәр территория. Су объектларына мониторинг бирү көн саен, тәүлек буе башкарыла. 4 кеше эшли. Шулай ук мәгълүмати такталар да куелган.

«Хәзерге вакытта сулыклардагы боз юка, аңа чыгарга ярамый. Күп урыннарда юылган урыннар бар. Боз астына китү куркынычы зур», — ди Дмитрий Трубин.

Шуңа күрә куркынычсызлык кагыйдәләрен үтәү хәерле булыр, ди белгечләр. Озакламый Камада язгы ташу башланачак. Фаразлар буенча, апрельнең уннарына туры килә.