ҖӘМГЫЯТЬ

Түбән Камада 2026 елга торак төзү буенча билгеләнгән еллык план инде 13,5 процентка арттырып үтәлгән. Ел башыннан бирле шәһәрдә 68 мең квадрат метрдан артык торак файдалануга тапшырылган.

Бу хакта муниципалитеттагы «Эшлекле дүшәмбе» киңәшмәсендә Түбән Кама районы башкарма комитетының шәһәр төзелеше сәясәте һәм архитектура идарәсе Җитәкчесе Ольга Никитина хәбәр итте.

Бүгенге көндә шәһәрдә 19 күпфатирлы йорт төзелә. Аларның дүртесе социаль ипотека программасы кысаларында сафка бастырыла. Әлеге проектлар арасында 29 нчы микрорайонда урнашкан ике 18 катлы йорт һәм Табиев урамындагы ике 10 катлы йорт бар. 29 нчы микрорайондагы йортларның әзерлеге 88 процент тәшкил итә. Ә Табиев урамындагы яңа йортлар төзелеше күптән түгел генә башланган.

Табеев урамындагы ике 10 катлы йорт урман ягы белән чиктәш мәйданда төзеләчәк. Бу — Татарстан Рәисе каршындагы Дәүләт торак фондының социаль ипотека программасы кысаларында «Татнефть» гавами акционерлык Җәмгыяте проекты.

Ольга Никитина сүзләренә караганда, хәзерге вакытта төзелеп килүче 19 күпфатирлы йортның унысы югары әзерлек дәрәҗәсендә, Җидесе — уртача әзерлектә, икесендә төзелеш эшләре башлангыч этапта.

Почта бүлекчәләре яңартылачак

Муниципаль районда 2026 елда берничә почта бүлеген капиталь ремонтлау һәм яңаларын төзү планлаштырыла. Капиталь төзекләндерү Благодатная авылындагы, Сухрау һәм Югары Уратма авылларындагы почта бүлекләренә кагылачак. Ә Прости, Иске Чишмә, Шәңгәлче һәм Түбән Уратма авылларында тиз төзелә торган конструкцияләрдән яңа почта бүлекләре салыначак. Бу эшләр турында да район башкарма комитетының шәһәр төзелеше сәясәте һәм архитектура идарәсе Җитәкчесе Ольга Никитина «Эшлекле дүшәмбе» киңәшмәсендә хәбәр итте.