Яңа мөмкинлекләр куандыра

Татарстан Рәисе Рөстәм Миңнеханов эш сәфәре белән Түбән Камага килде. Республика Җитәкчесе шәһәрдәге «Беренчеләр йорты»нда булып, балалар һәм яшьләр белән аралашты, яңа бинадагы эшчәнлек белән танышты.

«Беренчеләр йорты»нда яшьләрнең буш вакытын файдалы һәм эчтәлекле үткәрү өчен төрле мөмкинлекләр булдырылган. Рөстәм Миңнеханов театр студиясен, хореография залын, коворкингны, уен һәм арт-зоналарны, тавыш яздыру студиясен, медиабүлмәне карады, тәрбияләнүчеләр һәм остазлар белән сөйләште.

Татарстан Рәисе яшь буынның һәрьяклап үсеше өчен уңайлы шартлар тудыруның мөһимлеген билгеләп үтте. Аның сүзләренчә, мәктәптән соң балаларның үзләре теләп бирегә килүе, спорт, иҗат белән шөгыльләнүе, яңа күнекмәләр үзләштерүе өчен барлык мөмкинлекләр дә булырга тиеш. «Бу бик мөһим һәм игелекле эш. Безнең киләчәк — яшьләр кулында. Балалар өчен барлык шартларны да булдырырга кирәк. Биредә тормыш кайнап торсын», — дип ассызыклады Рөстәм Миңнеханов.

Сәфәр барышында Татарстан Рәисе «Мәктәпкә Җыенырга ярдәм ит» акциясендә дә катнашты. Ул беренче сыйныфка барырга әзерләнүче 25 балага мәктәп кирәк-яраклары белән тулыландырылган портфельләр тапшырды. Бүләкләр махсус хәрби операциядә катнашучыларның балаларына, шулай ук аз керемле, күпбалалы һәм опекадагы гаиләләрдә тәрбияләнүче булачак беренче сыйныф укучыларына да бирелде.

Шул ук көнне Түбән Камада Сөембикә урамындагы 9 нчы йортта яшәүчеләр яңартылган ишегалды ачылышын бәйрәм итте. Өйрәнелгән территория республикабызның «Безнең ишегалды» программасы кысаларында төзекләндерелгән. Тантанада Татарстан Рәисе Рөстәм Миңнеханов та катнашты.

Яңартылган ишегалды Сөембикә урамындагы 9, 11 һәм 13 нче йортларны берләштерә. Биредә якынча ике мең кеше яши. Төзекләндерү эшләре Җирле халыкның теләк-тәкъдимнәрен исәпкә алып башкарылган. Ишегалдында заманча балалар мәйданчыклары, урам тренажёрлары, футбол капкалары, велосипед кую урыннары, уңайлы эскәмияләр һәм яңа яктырту системасы барлыкка килгән. Нәтиҗәдә, элеккеге ишегалды бөтен яшьтәге кешеләр өчен уңайлы ял һәм аралашу урынына әверелгән.

Төзекләндерелгән әлеге ишегалды да Түбән Камада кешеләр өчен уңайлы мохит булдыруга юнәлдерелгән эшләрнең ачык мисалы. Биредә балалар һәм яшьләр өчен үсеш мөмкинлекләре артса, өлкәннәр өчен дә аралашу һәм ял итү өчен уңайлы шартлар тудырылган.