Түбән Камага – 60 ел

Ул 1937 елның 20 гыйнварында Татарстанның Азнакай районы Әсәй авылында дөньяга килә. Тормыш юлын иртә башлаган Ганҗә Галимовна 1955 елда ук хезмәткә керешә — Актүбә шәһәрендә «Татнефтепромстрой» трестының төзелеш идарәсендә буяучы булып эшли башлый. Ә инде 1961 елда ул язмышын Түбән Кама белән бәйли: Бөтенсоюз удар комсомол төзелешенә килеп, шәһәрнең нигезен салучылар сафына кушыла.

Хезмәт юлын гади буяучы булып башлаган Ганҗә апа үзенең тырышлыгы, җаваплылыгы белән аерылып тора һәм аны бригадир итеп билгелиләр. Ул «Татэнергострой» идарәсе төзелешләрендә эшләп, Түбән Каманың иң әһәмиятле объектларын төзүдә катнаша. Аның кул җылысы төшкән биналар арасында — автовокзал, Бигеш аэропорты, Техника йорты, «Җәлил» кинотеатры, «Кама» кунакханәсе, шулай ук нефть химиясе комбинаты һәм шин заводы цехлары бар. Бу биналар бүген дә шәһәребезнең үсешен, хезмәт кешесенең батырлыгын искә төшереп тора.

Ганҗә Галим кызы җәмәгать эшләреннән дә читтә калмый. Ул профсоюз оешмаларында актив эшли, СССРның энергетика һәм электрификация министрлыгы профсоюзы өлкә комитеты әгъзасы, соңрак профсоюзларның үзәк комитет әгъзасы була, профсоюзлар съезды делегаты итеп сайлана. Аның тормышы — хезмәт белән җәмәгать эшчәнлеген үрелдереп алып бару үрнәге.

1981 елда Түбән Кама шәһәрен төзүдәге зур казанышлары өчен аңа иң югары дәүләт бүләге — «Социалистик Хезмәт Герое» исеме бирелә. Бу исем белән бергә ул Ленин ордены һәм «Урак һәм Чүкеч» алтын медале белән бүләкләнә. Моннан тыш, аның күкрәген «Хезмәт Кызыл Байрагы», «Октябрь революциясе» орденнары, күпсанлы медальләр бизи. Ул шулай ук «ТАССРның атказанган төзүчесе» дигән мактаулы исемгә лаек була, ә исеме Татарстан Геройлары китабына кертелә.

Ганҗә апа гомеренең соңгы елларына кадәр яшь буын белән эшләүгә зур игътибар бирә. Түбән Кама политехник колледжы студентларына һөнәри осталык серләрен өйрәтә, очрашуларда чыгыш ясый, тормыш тәҗрибәсе белән уртаклаша. Аның сүзләре, киңәшләре күп кенә яшьләргә юл күрсәткеч була.

2021 елда Түбән Кама шәһәр Советы карары белән, шәһәр үсешенә керткән зур өлеше һәм актив җәмәгать эшчәнлеге өчен, Ганҗә Галим кызы Әхмәдиевага «Түбән Кама шәһәренең Мактаулы гражданины» исеме бирелә. Кызганыч, шул ук елның 16 октябрендә ул арабыздан китә. Әмма аның исеме, хезмәте, төзегән биналары һәм тәрбияләгән шәкертләре аша ул һаман да безнең белән. Ганҗә Әхмәдиева — хезмәткә тугрылык, ихласлык һәм Ватанга мәхәббәт символы булып кала.